سوال نمبر:6197
السلام علیکم! مفتی صاحب چند روز قبل میں نشہ کی حالت میں تھا۔ اسی کیفیت میں جب گھر آیا تو بیوی سے کچھ تلخ کلامی ہوئی تو میں نے اُسے کئی بار طلاق، طلاق بول دیا۔ میں جب نشہ کی حالت سے باہر آیا تو مجھے بتایا گیا کہ میں نے اپنی بیوی کو طلاقیں دے دی ہیں۔ اس وقت مجھے بہت افسوس ہوا کیونکہ میں اپنی بیوی کو طلاق نہیں دینا چاہتا تھا۔ یہ جو کچھ ہوا نشہ کی حالت میں ہوا۔ اس کے بارے میں جاننا چاہتا ہوں کہ طلاق واقع ہوئی ہے یا نہیں؟ شرعی رہنمائی درکار ہے۔

• سائل: کاشف محمودمقام: لاہور

• تاریخ اشاعت: 23 اکتوبر 2024ء

زمرہ: طلاق  |  تمباکو نوشی اور منشیات

جواب:

طلاقِ سُکران کے وقوع یا عدمِ وقوع کے بارے میں صحابۂ کرام l کے مابین اختلاف منقول ہے، اور یہی اختلاف فقہائے کرام اور ائمۂ مجتہدین کے درمیان بھی پایا جاتا ہے۔ فقہائے احناف کے نزدیک اگر کوئی شخص کسی نشہ آور چیز کو قصداً اور از خود استعمال کرکے نشہ کی ایسی حالت کو پہنچ جائے جس میں اس کی عقل و شعور متاثر ہو، تو اس کی جانب سے صادر ہونے والی طلاق کو زجراً نافذ قرار دیا جائے گا؛ تاکہ لوگ نشہ آور اشیاء کے استعمال کو طلاق سے بچنے کا ذریعہ نہ بنائیں۔ تاہم اگر کسی شخص کو دھوکے سے یا اس کی لاعلمی میں نشہ آور چیز کھلا دی یا پلا دی جائے اور اس کے نتیجے میں اس پر ایسی مدہوشی طاری ہو جائے کہ اس کی عقل و شعور مغلوب ہو جائیں، پھر وہ اس حالت میں طلاق دے، تو فقہائے احناف کے نزدیک ایسی طلاق واقع نہیں ہوتی۔ البتہ موجودہ دور کے حالات اور نشہ آور اشیاء کے بڑھتے ہوئے استعمال کو پیشِ نظر رکھتے ہوئے اس مسئلے پر ازسرِنو غور کی ضرورت محسوس ہوتی ہے۔ خصوصاً جب طلاق کے الفاظ اس حالت میں صادر ہوں کہ انسان کی عقل و شعور بالکلیہ یا اس حد تک مغلوب ہو چکے ہوں کہ اسے اپنے قول و فعل کا ادراک اور قصد باقی نہ رہے، تو ایسی صورت میں طلاق کے وقوع کا حکم اصلِ عدمِ وقوع اور مقتضائے قیاس کے زیادہ قریب معلوم ہوتا ہے؛ کیونکہ طلاق ایک شرعی تصرف ہے اور اس کے معتبر ہونے کے لیے ادراک، قصد اور اختیار کا پایا جانا بنیادی اہمیت رکھتا ہے۔ لہٰذا محض زجر و تادیب کی غرض سے ہر حال میں طلاق کو نافذ قرار دینا اس وقت محلِ نظر ہے جب نشہ کی شدت اس درجے تک پہنچ جائے کہ عقل و شعور ہی زائل ہو جائیں۔ مزید برآں، احادیثِ مبارکہ سے بھی یہ اصول مستفاد ہوتا ہے کہ جب کسی شخص کی عقل و تمییز اس حد تک مغلوب ہو جائے کہ وہ اپنے اقوال و افعال کا شعوری ادراک نہ رکھتا ہو، تو اس کے شرعی تصرفات کا حکم عام حالت کے تصرفات جیسا نہیں رہتا۔ چنانچہ مدہوش اور فاقدِ شعور شخص کی طلاق کے عدمِ وقوع پر احادیثِ نبویہ سے استدلال کیا گیا ہے۔ اسی مفہوم کی تائید درج ذیل حدیثِ مبارک سے بھی ہوتی ہے:

امام بخاری رحمہ اللہ نے ترجمۃ الباب کے ضمن میں حضرت عبداللہ بن عباس k کا ایک قول نقل فرمایا ہے:

علامہ کاسانی رحمہ اللہ نے پہلے یہ بیان فرمایا ہے کہ جمہور صحابۂ کرام رضی اللہ عنہم اور فقہاء کرام کے نزدیک سکران (نشہ کی حالت میں مبتلا شخص) کی طلاق واقع ہو جاتی ہے، البتہ حضرت عثمانِ غنی رضی اللہ عنہ سے منقول ہے کہ سکران کی طلاق واقع نہیں ہوتی۔ یہی مؤقف امام طحاوی اور امام کرخی رحمہما اللہ کا بھی ہے، جبکہ امام شافعی رحمہ اللہ سے بھی ایک قول عدمِ وقوعِ طلاق کا منقول ہے۔ اس کے بعد علامہ کاسانی رحمہ اللہ رقم طراز ہیں:

مذکورہ بالا تفصیل سے واضح ہوتا ہے کہ اگر نشے کی وجہ سے انسان کی عقل و شعور اس حد تک زائل ہوجائے کہ وہ اپنے قول و فعل پر قابو نہ رکھ سکے، تو ایسی حالت میں دی گئی طلاق واقع نہیں ہوتی۔ لہٰذا صورتِ مسئولہ میں اگر آپ نے بھی ایسی حالت میں، جب نشے کا غلبہ آپ کی عقل و شعور پر اس درجے میں تھا کہ آپ اپنے اقوال و افعال کا ادراک نہیں رکھتے تھے، طلاق کے الفاظ کہے تھے، اور نشے کی حالت ختم ہونے کے بعد حالتِ ہوش میں ان طلاقوں کی تصدیق یا توثیق بھی نہیں کی، تو ایسی صورت میں وہ طلاقیں شرعاً واقع نہیں ہوئیں۔ لہٰذا اگر مذکورہ تفصیل حقیقت پر مبنی ہے تو آپ دونوں کا بدستور میاں بیوی کی حیثیت سے ساتھ رہنا شرعاً جائز ہے۔ تاہم آئندہ ایسی قبیح اور خطرناک حرکت سے مکمل اجتناب لازم ہے، کیونکہ نشہ انسان کی عقل و شعور کو زائل کرکے اسے متعدد شرعی اور معاشرتی مفاسد میں مبتلا کردیتا ہے۔

واللہ و رسولہ اعلم بالصواب۔

مفتی: محمد شبیر قادری