سوال نمبر:6178
السلام علیکم! مفتی صاحب مجھے ایک اہم مسئلہ کے بارے میں فتویٰ درکار ہے کہ ہمارے ہاں چند دن پہلے ایک صاحب کے والد محترم کی وفات ہوئی ہے۔ انہوں نے اپنے والد کی نماز جنازہ ادھر خود پڑھائی چوتھی تکبیر نہیں کہی، لیکن جب اُن سے معلوم کیا تو انہوں نے بتایا کہ چوتھی تکبیر میں نے آہستہ آواز میں کہی تھی۔ اُن کے والد کا جنازہ تیسرے دن پاکستان میں بھی پڑھایا گیا۔ اب دریافت طلب امر یہ ہے کہ کیا چار تکبیرات کہنا ضروری ہے؟ آہستہ تکبیر کہنے کی صورت میں حکم شرعی کیا ہوگا؟ بالفرض چوتھی تکبیر نہیں کہی گئی تو پھر بھی حکم شرعی واضح کر دیں کہ نماز جنازہ ہوئی یا نہیں؟

• سائل: حسن میر قادریمقام: پیرس؛ فرانس

• تاریخ اشاعت: 28 اگست 2023ء

زمرہ: نماز جنازہ

جواب:

احناف کے ہاں نماز جنازہ کے دو ارکان ہیں، ایک قیام اور دوسرا چار تکبیرات ہیں۔ قیام کے بارے میں کسی امام کا اختلاف نہیں ہے جبکہ تکبیرات کے بارے میں روایات مختلف ہونے کی وجہ سے تعداد کے حوالے سے اَئمہ فقہ میں اختلاف پایا جاتا ہے لیکن فقہاء احناف نے رسول اللہ ﷺ کے آخری عمل کو دلیل بنایا ہے، اس لیے وہ چار تکبیرات کے قائل ہیں کیونکہ انہوں نے آپ ﷺ کے آخری عمل کی بنیاد پر نماز جنازہ میں چار سے زیادہ تکبیرات پر دلالت کرنے والی روایات کو منسوخ قرار دیا ہے اور صحابہ کرام رضوان اللہ علیہم اجمعین کا بھی اسی پر اجماع ہے جیسا کہ امام بیہقی رحمہ اللہ نے سنن الکبری میں یہی باب باندھا ہے۔ اور اس روایت کو امام طبرانی رحمہ اللہ نے بھی نقل کیا ہے:

امام ابوحنیفہ رحمہ اللہ کی سند سے بھی ایک روایت نقل کی گئی ہے جس میں صحابہ کرام رضوان اللہ علیہم اجمعین کی جماعت نے چار تکبیرات آپ ﷺ کا آخری عمل بتایا ہے، وہ روایت درج ذیل ہے:

ان روایات کے بیان کرنے کا مقصد ہے کہ نماز جنازہ میں چار تکبیرات پر کثیر صحابہ کرام رضوان اللہ علیہم اجمعین اور اَئمہ احناف کا اجماع ہے۔ لہٰذا نماز جنازہ میں چار تکبیریں فرض ہیں، اگر ان میں سے ایک بھی رہ جائے تو نماز جنازہ نہیں ہوتی، اس کا لوٹانا واجب ہوتا ہے۔ فقہاء کرام نماز جنازہ کی تکبیرات کے بارے میں فرماتے ہیں:

نمازِ جنازہ میں چار تکبیریں فرض ہیں، پس اگر ایک تکبیر بھی چھوٹ گئی، تو نماز نہیں ہوگی اعادہ کیا جائے گا، ’’کافی ‘‘ میں بھی اسی طرح ہے۔ جیسا کہ فتاویٰ ہندیہ میں ہے:

صورتِ مسئلہ کے مطابق اگر امام صاحب نے چوتھی تکبیر آہستہ آواز سے کہہ دی ہے تو نماز جنازہ بلا کراہت ہو گئی ہے۔ اگر چوتھی تکبیر آہستہ آواز میں بھی نہیں کہی گئی تو اس صورت میں نماز جنازہ دوبارہ ادا کرنا لازم آتا ہے چونکہ مرحوم کی نماز جنازہ دوبارہ ادا کر دی گئی ہے۔ لہٰذا پہلے جنازہ میں چوتھی تکبیر نہ کہنے کی صورت میں بھی نماز جنازہ دوبارہ پڑھنے سے کمی پوری ہو چکی ہے۔ اگر نماز جنازہ دوبارہ نہ پڑھی جاتی تو مرحوم کی قبر پر دوبارہ نماز جنازہ پڑھنا ضروری تھا۔

واللہ و رسولہ اعلم بالصواب۔

مفتی: محمد شبیر قادری