جنت کسے کہتے ہیں؟

’’اللہ تعالیٰ نے فرمایا ہے کہ میں نے اپنے نیک بندوں کے لئے ایسی چیز تیار کر رکھی ہے کہ جس کو نہ کسی آنکھ نے دیکھا اور نہ اس کی خوبیوں کو کسی کان نے سنا اور نہ کسی انسان کے دل پر اس کی ماہیت کا خیال گزرا۔ اس کی دیوار سونے چاندی کی اینٹوں اور مشک کے گارے سے بنی ہے۔ اس کی ایک اینٹ سونے کی اور ایک چاندی کی ہے، زمین زعفران کی کنکریوں کی جگہ موتی اور یاقوت سے بنی ہے۔‘‘

بخاري، الصحيح، 3 : 1185، کتاب بدء الخلق، رقم : 3072

كَأَنَّهُنَّ الْيَاقُوتُ وَالْمَرْجَانُO

الرحمن، 55 : 58

’’گویا وہ یاقوت اور مونگا ہیں۔‘‘

وَ زَرَابِيُّ مَبْثُوثَةٌO

الغاشية، 88 : 16

’’اور پھیلی ہوئی چاندیاں ہیں۔‘‘

فِيهِمَا فَاكِهَةٌ وَنَخْلٌ وَرُمَّانٌO

الرحمن، 55 : 68

’’ان میں میوے اور کھجوریں اور انار ہیں۔‘‘

مُتَّكِئِينَ عَلَى رَفْرَفٍ خُضْرٍ وَعَبْقَرِيٍّ حِسَانٍO

الرحمن، 55 : 76

’’تکیہ لگائے ہوئے (ہیں) سبز بچھونوں اور منقش خوبصورت چاندیوں پر۔‘‘

’’پکارنے والا پکار کر کہے گا (اے جنت والو!) تم تندرست رہو گے کبھی بیمار نہ ہو گے، تم زندہ رہو گے کبھی نہ مرو گے، تم جوان رہو گے کبھی بوڑھے نہ ہو گے اور تم آرام سے رہو گے کبھی محنت و مشقت نہ اٹھاؤ گے۔‘‘

مسلم، الصحيح، 4 : 2182، کتاب الجنة و صفة نعمها، رقم : 2837

’’اللہ تعالیٰ کے نزدیک سب سے بڑے مرتبے کا جنتی وہ شخص ہو گا جو صبح و شام دیدار الٰہی سے مشرف ہو گا۔ اس کے بعد حضور نبی اکرم ﷺ نے یہ آیت کریمہ تلاوت فرمائی :

وُجُوهٌ يَوْمَئِذٍ نَّاضِرَةٌO إِلَى رَبِّهَا نَاظِرَةٌO

القيامة، 75 : 22 - 23

’’یعنی اس روز بہت سے چہرے اپنے پروردگار کے دیدار سے تروتازہ اور خوش و خرم ہوں گے۔‘‘

ترمذي، السنن، 8 : 688، کتاب صفة الجنة، رقم : 2553.